राष्ट्रीय बुद्धिबळ स्पर्धेत अनुष्का कुतवळची सुवर्णभरारी!

सलग दोन वर्षे राष्ट्रीय विजेतेपदावर मोहोर; विद्या प्रतिष्ठान सुपे स्कूलच्या शिरपेचात मानाचा तुरा

विद्या प्रतिष्ठानच्या सुपे इंग्लिश मिडीयम स्कूलची इयत्ता बारावी (सायन्स) मध्ये शिकणारी विद्यार्थिनी कु. अनुष्का बापू कुतवळ हिने राष्ट्रीय बुद्धिबळ स्पर्धेत सलग दुसऱ्या वर्षी सुवर्णपदक पटकावून उल्लेखनीय यश संपादन केले आहे. दिल्ली येथे आयोजित ७० व्या राष्ट्रीय शालेय बुद्धिबळ अजिंक्यपद स्पर्धेत तिने सुवर्णपदक मिळवून राष्ट्रीय स्तरावर आपले वर्चस्व सिद्ध केले आहे. अनुष्काने आपल्या बुद्धिमत्तेच्या, एकाग्रतेच्या, जिद्दीच्या आणि सातत्यपूर्ण सरावाच्या जोरावर हे यश संपादन केले आहे. सलग दोन वर्षे राष्ट्रीय स्तरावर सुवर्णपदक मिळविण्याची तिची कामगिरी विशेष कौतुकास्पद असून, तिच्या या यशामुळे शाळेच्या शैक्षणिक व क्रीडा क्षेत्रातील नावलौकिकात भर पडली आहे. तिच्या या यशाने बारामती तालुक्यासह संपूर्ण महाराष्ट्राचा गौरव वाढविला आहे. अनुष्काच्या या यशाबद्दल परिसरातून तिच्यावर अभिनंदनाचा वर्षाव होत असून, विद्या प्रतिष्ठानचे उपाध्यक्ष ॲड. अशोक प्रभुणे, विश्वस्त मा. सुनेत्रावहिनी पवार, खजिनदार मा. श्री. युगेंद्रदादा पवार, सचिव ॲड. नीलिमा गुजर, सदस्य डॉक्टर आर. एम. शहा, सदस्य श्री. किरण गुजर, सदस्य श्री. मंदार सिकची, रजिस्ट्रार श्रीष कंबोज तसेच स्कूलचे प्राचार्य डॉ. योगेश पाटील आणि संपूर्ण शालेय परिवाराने अनुष्काचे पालक, प्रशिक्षक व सर्व मार्गदर्शकांचे मनःपूर्वक अभिनंदन केले असून, पुढील वाटचालीसाठी शुभेच्छा दिल्या आहेत.

🏆 *क्रीडा क्षेत्रात विद्या प्रतिष्ठान सुपेची दमदार कामगिरी; चार विद्यार्थ्यांची विभागीय स्पर्धेसाठी निवड*

जिल्हास्तरीय स्केटिंग स्पर्धेत U-19 मुलांच्या गटात शाळेच्या रुद्र संतोष तरटे (इयत्ता ८ वी, ब) याने उत्कृष्ट कामगिरी करत क्वाड स्केटिंग प्रकारात तीन सुवर्णपदके मिळविली. तसेच शिवतेज प्रदीप चांदगुडे (इयत्ता ६वी, ब) याने इनलाईन स्केटिंग प्रकारात तीन सुवर्णपदके व एक रौप्यपदक पटकावले. तसेच तालुकास्तरीय बुद्धिबळ स्पर्धेत शाळेच्या अनुष्का बापू कुतवळ (इयत्ता १२ वी) हिने U-19 मुलींच्या गटात प्रथम क्रमांक व शौर्य नितीन भोंडवे याने U-14 मुलांच्या गटात प्रथम क्रमांक मिळविला.